युक्रेनभन्दा रूससँग सम्झौता गर्न सजिलो : राष्ट्रपति ट्रम्प
युक्रेनभन्दा रूससँग सम्झौता गर्न सजिलो : राष्ट्रपति ट्रम्प
गण्डकी टाइम्स
शुक्रवार, फाल्गुण २३ २०८१
गण्डकी टाइम्स
शुक्रवार, फाल्गुण २३ २०८१
वासिङ्टन। अमेरिकी राष्ट्रपति डोनाल्ड ट्रम्पले युक्रेन र रूसबीच शान्ति सम्झौता गराउने प्रयासमा युक्रेनलाई सँधै कठिन साझेदारका रूपमा पाएको बताएका छन्। ट्रम्पले "रूससँग सम्बन्ध राम्रो हुँदै गएको" भन्दै "युक्रेनभन्दा मास्कोसँग सम्झौता गर्न सजिलो हुन सक्छ" भन्ने धारणा राखेका छन्।
राष्ट्रपति ट्रम्पले युद्धविराम नभएसम्म रूसमाथि ठूलो मात्रामा नयाँ प्रतिबन्ध र व्यापारिक शुल्क (ट्यारिफ) लगाउने चेतावनी समेत दिएका छन्। तर, केही घण्टापछि उनले "राष्ट्रपति भ्लादिमिर पुटिनले अहिले जुन कदम चालिरहेका छन्, त्यो कुनै पनि नेताले आफ्नो देशको सुरक्षाका लागि चाल्ने कदम हुन सक्छ" भन्ने टिप्पणी गरेका छन्।
अमेरिकी सरकारले हालै युक्रेनलाई दिँदै आएको सैन्य सहायता र गुप्तचर सूचना (इन्टेलिजेन्स) साझेदारी अस्थायी रूपमा रोक्ने निर्णय गरेको छ। अन्तरिक्ष प्रविधि कम्पनी म्याक्सार ले बीबीसीलाई दिएको जानकारी अनुसार, अमेरिकाले युक्रेनलाई केही भू-उपग्रह (स्याटेलाइट) तस्वीरहरू उपलब्ध गराउने पहुँचसमेत रोकिएको छ।
यो निर्णय राष्ट्रपति ट्रम्पले युक्रेनी राष्ट्रपति भोलोडिमिर जेलेन्स्कीलाई "अमेरिकासँग असम्मानजनक व्यवहार गरेको" भनेर सार्वजनिक रूपमा आलोचना गरेपछि आएको हो। ट्रम्पको चेतावनीपछि रूसले बिहीबार राति युक्रेनको ऊर्जा पूर्वाधारमा ठूलो मात्रामा क्षेप्यास्त्र र ड्रोन आक्रमण गरेको छ।
युक्रेन-रूस युद्ध अन्त्य गर्ने प्रयासस्वरूप राष्ट्रपति ट्रम्प चाँडै नै साउदी अरेबिया जाने तयारीमा छन्। उनको यो भ्रमण साउदी अरेबियाले अमेरिकी कम्पनीहरूमा १ ट्रिलियन डलर लगानी गर्ने सम्झौता गरेसँगै तय भएको हो। अर्कोतर्फ, अमेरिकी विदेशमन्त्री मार्को रुबियोसहितका कूटनीतिज्ञहरू साउदी अरेबियामा युक्रेनी प्रतिनिधिहरूसँग शान्ति वार्ताका लागि भेटघाट गर्ने कार्यक्रम तय भएको छ।
प्रतिक्रिया
